កុំចាញ់បោកគេទៀត! នាយកដ្ឋានអន្តោប្រវេសន៍សូមធ្វើការក្រើនរំលឹកថា៖ ការបំពេញសលាកបត្រចុះឈ្មោះចូលក្នុងប្រទេសតៃវ៉ាន់តាមប្រព័ន្ធអ៊ីនធើណេត (TWAC) គឺ “មិនគិតថ្លៃទាំងស្រុង” កុំធ្លាក់ចូលក្នុងអន្ទាក់ឆបោកគេអោយសោះ

• ថ្ងៃខែប្រកាស： 2025-11-21
• អង្ការដែលប្រកាស：Border Affairs Corps
• ចុចមើល ：23
• ថ្ងៃផ្តល់ពត៌មានថ្មីបំផុត：2025-11-21

គិតចាប់តាំងពីថ្ងៃទី១ ខែតុលា ឆ្នាំ២០២៥ នេះតទៅ តៃវ៉ាន់បានដាក់អោយប្រើប្រាស់ជាផ្លូវការនូវការបំពេញសលាកបត្រចុះឈ្មោះចូលក្នុងប្រទេសតាមប្រព័ន្ធអ៊ីនធើណេត (TAIWAN ARRIVAL CARD ហៅកាត់ថា TWAC) ប៉ុន្តែថ្មីៗនេះប្រទះឃើញថាមានបុគ្គលអសីលធម៌បានបង្កើតគេហទំព័រឆបោកក្លែងក្លាយ ហើយបានប្រើប្រាស់ពាក្យគន្លឹះដូចជា TWAC, TAIWAN ARRIVAL CARD ជាដើមក្នុងការផ្សព្វផ្សាយបោកបញ្ឆោតអ្នកដំណើរបរទេសអោយមានការភ័ន្តច្រលំចុចចូលទៅកាន់គេហទំព័រនិងបំពេញពត៌មាន ហើយឆបោកអោយបង់ថ្លៃសេវា។ នាយកដ្ឋានអន្តោប្រវេសន៍សូមធ្វើការក្រើនរំលឹកថា ការបំពេញ TWAC តាមប្រព័ន្ធអ៊ីនធើណេតគឺ “មិនគិតថ្លៃទាំងស្រុង” សូមអ្នកទាំងអស់គ្នាប្រុងប្រយ័ត្ន កុំចាញ់បោកគេទៀត។

អ្នកដំណើរបរទេសអាចចូលទៅធ្វើការស្នើសុំនៅលើគេហទំព័រផ្លូវការ TWAC នៃនាយកដ្ឋានអន្តោប្រវេសន៍ (https://twac.immigration.gov.tw) ក្នុងរយៈពេល ៣ ថ្ងៃមុនពេលមកដល់តៃវ៉ាន់ គេហទំព័រនឹងមិនមានស្នើសុំអ្នកដំណើរអោយបង់ថ្លៃសេវាអ្វីទាំងអស់ សូមសាធារណជនត្រូវតែបង្កើនស្មារតីប្រុងប្រយ័ត្នអោយបានខ្ពស់ ជៀសវាងក្លាយជាជនរងគ្រោះនៃការឆបោក។ នាពេលបច្ចុប្បន្ន នាយកដ្ឋានអន្តោប្រវេសន៍ប្រមូលបានតំណភ្ជាប់ (link) ពាក់ព័ន្ធនៃគេហទំព័រឆបោកដែលសង្ស័យ បានរាយការណ៍ទៅកាន់នាយកដ្ឋានអភិវឌ្ឍន៍ឌីជីថល និងការិយាល័យប៉ុស្តិ៍ប៉ូលីសខាងផ្នែកឧក្រិដ្ឋកម្មនៃប៉ុស្តិ៍នគរបាលរដ្ឋបាលអោយជួយក្នុងការស៊ើបអង្កេតថាតើគេហទំព័រទាំងនេះមានជាប់ពាក់ព័ន្ធទៅនឹងសកម្មភាពខុសច្បាប់ដែរឬទេ។

ក្រៅពីនេះទៅទៀត ដើម្បីផ្សព្វផ្សាយការបំពេញសលាកបត្រចូលតៃវ៉ាន់ TWAC តាមប្រព័ន្ធអ៊ីនធើណេតនៅលើគេហទំព័រត្រឹមត្រូវ នាយកដ្ឋានអន្តោប្រវេសន៍ក្រៅពីបានធ្វើវីដេអូផ្សព្វផ្សាយដោយសង្កត់ធ្ងន់ទៅលើពត៌មានដែលមិនចាំបាច់បង់ថ្លៃសេវាអ្វីទាំងអស់ ហើយក៏បានសរសេរសំណើរទៅកាន់ការិយាល័យកុងស៊ុលនៃក្រសួងការបរទេស ក្រុមហ៊ុនសាជីវកម្មនៃព្រលានយន្តហោះអន្តរជាតិថាវយៀន (Taoyuan Internatinal Airport Cooperation) នាយកដ្ឋានទេសចរណ៍នៃក្រសួងដឹកជញ្ជូន និងអាជីវកម្មដឹកជញ្ជូននៃគ្រប់ក្រុមហ៊ុនអាកាសចរណ៍នានា ដោយស្នើសុំស្ថាប័ននិងខាងអាជីវកម្មដឹកជញ្ជូនពាក់ព័ន្ធអោយចូលរួមជួយផ្សព្វផ្សាយអំពីគេហទំព័រត្រឹមត្រូវ កងពលដោះស្រាយកិច្ចការងារព្រំដែន (Border Affairs Corps) នៃនាយកដ្ឋានអន្តោប្រវេសន៍ក៏បានពង្រឹងការប្រកាសផ្សព្វផ្សាយទៅកាន់អ្នកដំណើរបរទេសអោយធ្វើការបំពេញ TWAC នៅលើគេហទំព័រត្រឹមត្រូវ នៅតាមសាលច្រកចូលប្រទេសនៅគ្រប់ព្រលានយន្តហោះផងដែរ។ នាយកដ្ឋានអន្តោប្រវេសន៍សូមធ្វើការក្រើនរំលឹកថា វិធីសាស្រ្តឆបោកចេញមកថ្មីៗគ្រប់បែបគ្រប់យ៉ាង សូមអ្នកដំណើរបរទេសត្រូវតែធ្វើការបំពេញពត៌មានតាមរយៈការចូលទៅកាន់គេហទំព័រផ្លូវការនៃនាយកដ្ឋានអន្តោប្រវេសន៍ ឬស្កេន TWAC QR Code ជៀសវាងបង្កទៅជាការបាត់បង់ទ្រព្យសម្បត្តិ។